حبيت واحدة زميلتي من اول نظرة وحسيتها أحلى بنت في الكون

أنا شاب عندي 16 سنة، عايش في بيئة ريفية. أنا من النوع اللي مبيحبش المشاكل وبخاف من ربنا في كل حاجة، وكمان متفوق دراسيًا. الموضوع بدأ معايا لما كنت في مسابقة أوائل الطلبة، شفت بنت كانت قدامنا في المسابقة، مشفتش بنت زيها قبل كده، وحسيتها أحلى بنت في الكون.

أنا من النوع اللي بغض بصره عن البنات، لكن لما جت تمتحن لقيتها في اللجنة معايا صدفة، وكنا بنساعد بعض في الأسئلة. لما دخلت الثانوي، كنت بتمنى أشوفها. بس حصل موقف مش حلو في الامتحانات، حسيتها كانت زعلانة مني، فدخلت اعتذرتلها وهي قبلت.

بس بعد كده، أنا أصبحت أفكر فيها أكتر وأكتر، وأنا شغلان دماغي بيها كتير، والموضوع ده بيأثر على تركيزي. مكنتش بشوفها كتير بس في المراجعة كنا بنتقابل وكل ما تشوفني، تبتسم وتعملي لمحات. هي من النوع المتفوق، يمكن أكتر مني، ومحترمة جدًا. أنا حسيت أننا عندنا صفات مشتركة.

أنا مش عايز أرتبط بيها دلوقتي، لأني عاوز أركز في دراستي. أنا ناوي أروح أتقدملها لما أخلص، بس أنا خايف أضيعها وأندم. أنا حاولت أتقرب من ربنا أكتر وأتفرج على فيديوهات توعية، بس مشاعري تجاها أقوى من أي حاجة.

فكرت أبعتلها رسالة أعترفلها بحبي، بس بعدين قلت الأحسن أقولها لما أقابلها. بس أنا مش بشوفها خالص، وف نفس الوقت أقول أنا مش لازم أحب دلوقتي، لازم أكون ناجح في حياتي أول. ياريت تنصحوني.

مشاكل وحلول ذات صلة